Universiteti i Eberswaldes, Gjermani – Në një shembull frymëzues të bashkëpunimit dhe mobilitetit akademik, dy profesorë të shquar nga Fakulteti i Shkencave të Jetës dhe Mjedisit, Mirvjena dhe Ylli Kortoçi, po shfrytëzojnë mundësinë e tyre për një periudhë dy javore në Universitetin e Eberswaldes, duke u përfshirë në programin e shkëmbimeve ndërkombëtare Erasmus+.

Profesorja Mirvjena Kortoçi dhe profesori Ylli Kortoçi janë pjesë e një ekipi të përkushtuar të cilët ndajnë një pasion të përbashkët për shkencën dhe mbrojtjen e mjedisit. Gjatë kësaj periudhe të shkëmbimit, ata do të përfshihen në aktivitete të ndryshme akademike dhe shkencore në Fakultetin e Pyjeve dhe Mjedisit të Universitetit të Eberswaldes.

Për të pasuruar eksperiencën e tyre shkencore, ata do të marrin pjesë në seminare, punëtori dhe konferenca të specializuara, duke ndarë njohuri dhe duke bashkëpunuar me kolegët gjermanë. Ky shkëmbim i hulumtuesve do të kontribuojë në avancimin e dijes dhe praktikave të mira në fushën e shkencave të jetës dhe mjedisit, ndërsa edhe do të forcojë lidhjet ndërmjet Universitetit të Eberswaldes dhe institucioneve Kosovare.