Në ambientet e Fakultetit të Shkencave të Jetës dhe Mjedisit u mbajt promovimi i librit të titulluar “Menaxhimi i kafshëve të egra në Republikën e Kosovës”, një punim i jashtëzakonshëm nga eksperti i njohur Naim Ramadani dhe ish-studentja e diplomuar e fakultetit tonë, MSc. Evelina Ajazaj.

Ky libër ofron një pasqyrë të thelluar dhe njohuri të çmuara për menaxhimin e faunës së egër dhe rëndësinë e ruajtjes së biodiversitetit në Kosovë. Gjatë promovimit u theksuan kapitujt kryesorë të librit, si:

• Nevoja që gjuetia të trajtohet si një aktivitet multidimensional;
• Hartimi dhe zbatimi i akteve ligjore dhe nënligjore për gjuetinë;
• Karakteristikat e kafshëve të egra dhe ndërveprimet e tyre me mjedisin;
• Përdorimi i armëve për gjueti dhe specifikimet për llojet e kafshëve që mund të gjuhet në të gjithë territorin e Kosovës;
• Procedurat për aplikim për leje gjuetie;
• Menaxhimi i kafshëve për turizëm, analiza e dhëmbëve dhe brirëve të tyre, si dhe promovimi i profesionit të gjuetarit.

Ky libër plotëson një boshllëk të ndjeshëm në literaturën shqiptare mbi menaxhimin e kafshëve të egra dhe është një kontribut i rëndësishëm për lexuesit dhe profesionistët në këtë fushë.

Si fakultet, jemi krenarë për suksesin e Evelina Ajazajt, një shembull frymëzues për studentët tanë dhe një dëshmi e përkushtimit të fakultetit tonë për të nxjerrë profesionistë të shkëlqyer.

Urime autorëve për këtë arritje dhe për një kontribut të vlefshëm për mbrojtjen e biodiversitetit në Kosovë!